Dabaylaha roobabka wata ee Dean loogu magac daray ee ka soo bilowday koonfurta badda Caribbean-ka ayaa soo gaarey kuna dhuftay waddanka Mexico, iyadoo duufaanku uu sababay in laga qaxo goobaha dalxiiska iyo wershedaha saliidda qoda ee shaqaalaha badani ka shaqeeyo.

Duufaanka Dean oo gaarey derejada shanaad, ayaa ugu horrayntii ku dhuftay gacanka Yucatan ee dalka Mexico iyadoo ay dabayluhu ku soconayaa 225km saacaddii.

Madaxweynaha waddanka Mexico, Felipe Calderon oo haatan booqasho ku jooga dalka Canada ayaa sheegay in uu si degdeg ah ugu soo laaban doono waddankiisa si uu xaaladda iyo isbeddellada duufaankan uu go'aan uga qaato.

Madaxweynaha ayaa ka qayb gelaya kulan madaxeedka dalalka Waqooyiga Ameerika ee North American Freed Trade, ururkaas oo ay ku wada jiraan dalalka Maraykanka, Canada iyo Mexico.

Duufaanka Dean ayaa sidoo kale, cagta soo mariyey dalal dhawr ah oo ay kamid yihiin Dominican Republic, Haiti, Jamaica, Gasaa'irka Cayman iyo ugu dambayntii dalalka Belize iyo Mexico.

Maxamuud Faarax Bile

farahbile@hotmail.com