Gudoomiyaha Gobolka Banaadir ahna Duqa Magaalada Max'ed Cumar Xabeeb (Max'ed Dheer) ayaa ku eedeeyey qaraxyada iyo dilalka qorsheysan ee ka dhacaya magaalada Muqdisho, inay ka dambeeyaan odayaasha dhaqanka ee beelaha Hawiye ee Muqdisho.

Max'ed Dheere oo shir jaraa'id ku qabtey magaalada Muqdisho gaar ahaan Taliska Qaybta Booliiska Banaadir  ayaa si toos ah eedeyntaasi wuxuu ugu eedeeyey Max'ed Xasan Xaad iyo Nabadoon Axmed Diiriye Max'ed oo ka mid ah Golaha mideynta dhaqanka ee beelaha Hawiye.

Hadalkiisan ayuu Max'ed Dheere wuxuu ku sheegay in Odayaashaasi ay yihiin kuwa ka masuulka ka ah qaraxyada ka dhacaya Muqdisho, isagoo tibaaxay in odayaashaasi ay ku bixi doonaan dabka ay ka shaqeynayaan.\

"Kuwii dabkan ka damneeyey waxay ku baxeen dabkii ay aasaaseen, kuwana waxay ku bixi doonaan dabkan waxayna la mid noqon doonaan kuwa ka soo hadlaya Eritrea iyo meelo ka fog fog, waadna arki doontaan inay ka baxaan dabkan ay afuufeen" ayuu yiri Max'ed Dheere.

Eeedeynta ka timid Max'ed Dheere oo uusan u soo gudbin si muuqada oo cadeymo ah, ayaa timid 24 saac ka dib markii Odayaasha dhaqanka ee beelaha Hawiye ay sheegeen inay cambaareynayaan qaraxyada iyo dilalka ka dhacaya Magaalada Muqdisho.

Ma jiro wali wax ah oo ka soo baxay Odayaasha dhaqanka ee beelaha Hawiye oo ku aadan eedeynta uga timid Max'ed Dheere.

SBC News Desk