Wararka ka imaanaya magaalada Muqdisho ee caasimada ah ayaa sheegaya in weeraro hoobiyeyaal ah xaley laga maqley qaybo ka mid ah magaalada, gaar ahaan xaafada Hurwaa.

Weeraradan hoobiyeyaasha ah ayaa la sheegay in lagu tuuray saldhig ay ciidamada DFKMG ah ku leeyihiin Warshadii hore ee Barafuunka oo ku taal Isgoyska SOS.

Dad degan degmada Hurwaa oo ka gaabsadey in magacooda saxaafada laga xuso sababo dhanka amaanka ah ayaa u sheegay SBC in wax iyaga ula muuqdey qaraxyo hoobiyeyaal oo gaaraya ilaa shan lagu tuuray xeradaasi ay degan yihiin ciidamada Dawlada federaalka, waxaana dadkaasi goob joogayaashi ah ay sheegeen inaanay maqal wax jawaab ah oo ay ciidamadu ka bixiyeen weeraradaasi madaafiic ee lagu soo garaacay.

Weerarkan ayaa waxaa ka sii horeeyey qarax bam gacmeed oo lagu tuuray gawaari kolonyo ah oo ay wateen ciidamada Booliiska, oo marayey inta u dhaxaysa Suuqa xoolaha iyo Isgoyska SOS, iyadoon la sheegin khasaaraha soo gaarey ciidmada.

Habeenadii ugu dambeeyey waxaa soo kordhayey weerarada kooxaha hubaysan ee aan la garaneyn ku qaadayaan saldhiga ciidamada Itoobiyaanka iyo kuwa Dawlada federaalka, iyadoo taasina ay barbar socota hawlgalada dhinaca militriga oo ay wadajir u fulinayaan ciidamada iskaashanaya ee dawlada federaalka KMG ah.

SBC News Desk