Boqorka dalka sucuudiga oo maalintii shaley booqasho uu ku marayo dhowr dal oo carabeed uga bilaabatay magaalada Qaahira ee dalka Masar ayaa kulan kula qaatay magaalada Sharma Sheekh madaxweynaha dalka Masar Xusni Mubaarak

Afhayeenka arrimaha dibadda ee Masar ninka lagu magacaabo Xusaam Saki ayaa u sheegay saxaafadda in shir madaxeedkii labada mas’uul ay diiradda ku saareen xaaladda bariga dhexe , arrimaha Sudan iyo Somaliya , barnaamijka Nuclear-ka dowladda Iran iyo xalinta khilaafaadka dalalka carabta dhexdooda iyo xiriirka labada dal .

Boqorka sucuudiga ayaa la filayaa in manta uu gaaro magaalada Camaan ee dalka Urdun halkaasi oo uu kulamo lula qaadan doono dhigiisa dalka Urdun Boqor Cabdalla .

Sidoo kale boqor Cabdalla ayaa dalka Urdun uga sii ambabixi doono magaalada Dimishiq ee dalka Syria halkaaasi oo uu kulamo kula yeelan doono madaxweynaha dalka Syria Bashar Al-asad , waxaana lagu wadaa in ay kulankaas ku soo biiri doonaan madaxda dalalka Qadar iyo Lubnaan Miishal Suleymaan iyo Xama Bin Khaliifa Al-thani .

Dadka indha indheeya siyaasadda beriga dhexe ayaa ku micneenaya boqoshada boqorka dalka Sucuudiga uu ku marayo qaar kamid ah dalalka carabta mid lagu dardar gelinayo soo noolaynta xiriirka u dhexeeya dalal isku khilaafsan siyaasadda guud ee bariga dhexe.

Waxaa jira khilaaf u dhexeeya dalalka Masar iyo Syria kaasi oo kadhashay dilkii ra’iisal wasaarihii dalka Lubnaan Rafiiq Al-xariiri iyado sidoo kalana ay jiraan khilaaf u dhexeeya dalalka Qadar iyo Masar

Ustaad: C/xakiim Maxamed Cumar
SBC International- Monitoring