Way qurux badan yihiin, waa muhiim laakiin way dhici kartaa inaad biyo ku dhex tuurto oo aad dhaqdo mobile-kaaga marka laguu sheego in teleefonada Mobile-ka ee gacanta ay ka jeermis badan yihiin musqulaha, sidaasi waxaa lagu bilaabay daraasad cusub oo dhanka caafimaadka ah oo soo baxdey.

Daraasadan oo laga soo saarey wadanka Britain ayaa lagu ogaadey in 18 jeer ay ka jeermis badan yihiin telefoonada gacanta (Mobile) musqulaha la isticmaalo gaar ahaan qalabka loo yaqaan (flush handle) ee biyo raacinta godka musqusha la isticmaalo oo inta badan gacmaha lagu qabto xiliyada biyaha lagu furayo godadka musqulaha.

Jim Francis oo ah qabiir ku xeel dheer arimaha saxada caafimaadka ayaa sheegay in telefoonada gacanta Mobile-du ay ka usgag badan yihiin qalabka musqulaha ku rikaban, isagoo sheegay in laga helay bacteriyada loo yaqaan TVC.

Baaritaan lagu sameeyey oogada sare ee tiro ka mid ah mobile-da ayaa mid ka mid ah waxaa laga helay jeermis qatar ah oo qofka iska leh u keeni kara halis caafimaad oo dhanka caloosha ah, iyadoo taasina ay ugu wacan tahay gacmaha lagu qabto teleefonada mobile-da.

Noocyada jeermiska ay gacmuhu ku reebeen teleefonada gacanta (Mobile) ayaa qaarkood la sheegay inay la mid yihiin jeermiska baranbarada ay sido oo kale.

14.7 milyan oo ka mid ah mobile-da 63-da milyan ee laga isticmaalo wadanka UK ayaa daraasadu ku sheegtey inay xambaarsan yihiin noocyo jeermis qatar ah oo dhibaato ku keeni kara qofka iska leh mobile-kaasi, iyadoo talo lagu siiyey dadka inay u adeegsadaan qalabka nadaafada gacmaha teleefonada mobile-ka, isla markaana loo baahan yahay in si fudud oo qalalan loo nadiifiyo had iyo goor oogada sare, botamada iyo meelaha codka laga dhageysto ee teleefonada gacanta ama mobile-ka.

Cilmibaare Ceri Stanaway ayaa isna sheegay in inta badan teleefonada gacanta aanay si deg deg ah qofka ugu keeneen dhibaato caafimaad oo ka dhalata jeermiska balse ay si tartartiib ah ay bacteria-yadu ugu faafayso jirka qofka bini’aadamka ah.

Mowliid Xaaji Cabdi
mowliidsons@gmail.com