War ka soo baxay xarunta Midowga Yurub ee Magaalada Brussels ee wadanka Belgium ayaa lagu sheegay in gargaar lacageed oo gaaraya 35milyan 　oo yuuro ah oo u dhiganta 45 malyan oo dollar loogu deeqayo wadamada ku yaalla geeska iyo bartamaha Afrika, waxaana dalalkaasi ka mid ah Soomaaliya, Itoobiya, Jabuuti, Kenya, Uganda iyo kuwo kale, isagoo sheegay in lacagtaasi lagu taageerayo dadka ku dhibaateysan dalalkaasi.

Deeqdan Lacageed oo gaaraysa 35-Milyan oo Lacagta Euro ah ayaa waxaa la siinayaa dalalka Ethiopia, Soomaaliya iyo Eritrea, iyadoo ujeedada laga leeyahay bixinta Lacagtan ay tahay in wax looga qabto dadka dhibaataysan ee dalalkaas ku nool.

Midowga Yurub wuxuu sheegay in lacagtaasi inteeda badan lagu bixin doono baahiyaha dhinacyada caafimaadka, nafaqada, cuntada, biyaha iyo nadaafadda.

Kristalina Georgieva madaxa Midowga Yurub ee horumarinta iyo gargaagka bani’aadamnimada ayaa waxaa uu sheegay in uu rajaynayo in deeqdaasi ay gaarto dadka dhab ahaan u baahan si caddaalad ah, aan kala sooc lahayn iyadoo la marayo sharciyada u yaalla bixinta gargaarada bani’aadamnimo.

Kaalmadaasi lacageed waxaa ka faa’iideysan doona 3.2 milyan oo Soomaali ah oo ay ku jiraan dadkii ay barakiciyeen dagaaladii ka dhacay Muqdisho iyo bartamaha Soomaaliya.

Qaramada Midoobay ayaa iyaduna dhinaceeda waxa ay sheegtay in sanadkaan dhamaadkiisa kala bar dadka ku nool dalka Soomaaliya ay u baahnaan doonaan gar gaar dhinac walbo ah kadib markii ay dadkaasi dhibaato fara badan ay ka soo gaareen dagaalada ka soconaya dalka Soomaaliya .