Gudoomiyaha Golaha Amaanka ee midowga Africa Ninka lagu magacaabo Ramadaan Al-camaara oo Saxaafada kula hadley magaalada Kampala ayaa sheegay in dowladaha mareykanka iyo Norway ay balan qaadeen in dhaqaale siinayaan xukuumada midnimada Qaran ee Soomaaliya, si wax looga qabto dhinacyada dib u dhiska ciidamada, xarumaha dowladda .

Hadalka mas’uulka u qaabilsan midowga Africa dhanka amaanka ayaa yimid kadib markii ay magaalada Kampala ee dalka Uganda ay kulan ku yeesheen magaalada Kampala ee xarunta dalka Uganda madaxweynaha DKMG soomaaliya Shariif Sheekh Axmed iyo kaaliyaha xoghayaha arrimaha dibadda ee mareykanka Johnnie Carson .

Mr Al-camaara ayaa tilmaamay in uu soo dhoweenayo in dowladaha deeqda bixiyo ay taageerada ay u fidnayaan xukuumadda KMG soomaaliya ay noqoto mid si toos ah loogu gacan geliyo dowladda.

Balanqaadyada dowladaha mareykanka iyo Norway u fidiyeen dowladda Soomaaliya ayaan la ogeyn qaabka ay ku bixin doonaan, hase yeeshee kaaliyaha wasiirka arrimaha dibadda mareykanka u qaabilsan arrimaha Africa waxa uu sheegay in taageeradaasi ay u badnaaneyso mid dhaqaale.

Shir madaxeedkii magaalada Kampala uga socdey hogaamiyeyaasha wadamada midowga Africa ayaa waxaa la filayaa in manta la soo gabagabeeyo iyadoo lafilayo in laga soo saaro baaq ku aadan arimaha Soomaaliya.

Kulan madaxeedkan oo ahaa kii 15-aad oo ay isugu yimaadaan madaxda qaaradda Africa ayaa waxaa ka maqnaa madaxweynaha dalka Sudan Cumar Xasan Al-bashiir iyo madaxweynaha Masar Xusni Mubaarak iyo madaxweynaha dalka Eritrea Asayaas Afawarki .

Ustaad: C/xakiim Maxamed Cumar
SBC International- Monitoring