Madaxa xafiiska siyaasadda Xarakada wax iskacaabinta ee marka magacaeeda la soo gaabiyo loo yaqaan Xamaas Khaalid Mashcal oo haatan kusugan magaalo madaxda dalka Ruushka ee Moscow oo si wadajir ah shir saxaafadeed u wada qabteen wasiirka arrimaha dibadda Russia ninka lagu magcaabo Sergey Lafaroof ayaa sheegay in dhaqdhaqaaqa Xamaas uu u aargudi doono Maxmauud Almabxuux oo kamid ahaa hogaamiyaasha kaasi oo toddobaadkii la soo dhaafay lagu dilay magaalada Dubai ee dalka isutaga imaaraatka carabta.

Mashcal waxa uu tilmaamay in dhaqdhaqaaqa xamaas uusan caqabad ku ahayn degnaanshaha Gobolka bariga dhexe balse Israel ay tahay mid halis ku ah degnaanshaha Gobolka iyadoo hanjabaado isdaba joog ah u diraysa dalalka deriska la ah islamarkaana sii wada dhisidda guryo sharci dara ah dhulka filistiiniyiinta.

Mashcal waxa uu ku eedeeyey xukuumadda Washington in ay wado isku day ay ku doonayso in ay ku burburiso wadahadalada dhinacyada filistiiniyiinta iyadoo cadaadis ku saaraysa madaxweyne Maxamuud Cabaas in uusan wax wadahadal lagalin Xarakada Xamaas inta ay gacanta ku hayso marinka Gaza.

Mashcal waxa uu ka codsaday xukuumadda Russia in ay gacan ka gaysato dib u dhiska Marinka Gaza.

Booqashada Khaalid Mashcal ee dalka Russia ayaa noqonaysa tii saddexaad tan iyo intii dhaqdhaqaaqa Xamaas uu ku guleystay doorashooyinka barlamaaniga filistiin sanadii 2006.

Ustaad C/xakiim Maxamed Cumar
SBC International- Monitoring